پرچا اختر راځي او څوک اختر ته ورځي!

 زه اوس  په منډه منډه  اختر ته ورځم ،خو د ژوند خوږې خاطرې  مي د هغو کلونو سره تړلي چي اختر به په منډه منډه  زما لوري ته را روان و.  د اخترونو د  را  تللو  يا  اخترونوته  د  ورتللو  دا منډي د ژوند بهير دی ، کله څنګه کله څنګه، دريغه دريغه  .

 

د اختر په وياړ د بابوزی د تير کال اختريز شعر ډالی کوو  

 

 

د ماشوم  اختر

کاشکی زه ماشوم شم او اختر را باندي راشي
له دې ژونده ورستون شم بختور راباندي راشي

بيا می جامې جوړي او لاسونه راته سره کا
د مور په محبت کي خوندور را باندي راشي

سهار مي تلوسه شي چي ملګري ننداره کړم
ملګري له هر لور لکه لښکر راباندي راشي

ميله د اختري مو له پلرو ځني اخستې
مصرف ته يې هوا د قلندر راباندي راشي

يو و بل ته ښيو خپل کالی د لاس نکريزي
منډو کي خولې د سمندر راباندي راشي

ځو به فالوده ،نقل نخود به خورو پريمانه
نه يې کړو پروا که مازيګر را باندي راشي

ټوله ورځ ميله وي چي رسيږمه سم کور ته
مشر ورور په قهر زورور را باندي راشي

پوښتنه وکړي ولې ټوله ورځ په ميله تللې
د مور پوړنی سم لکه وزر را باندي راشي

بيا مي مور څه وسکونډي اوردي بدي وايې
ډاډ د محبت يې جادوګر را باندي راشي

څو مي پلار خبريږي ، زه بيده شمه له ډاره
خوب هم بيله ځنډه په پېخر را باندي راشي

کاشکي زه ماشوم شم او اختر راباندي راشي
له دې ژونده ورستون شم بختور راباندي راشي

٢٧ –  سنبله ١٣٨٨
١٨  – سيپتمبر ٢٠٠٩

محمد واصل وصال د عطاالله خوږياڼي مرکه

محمد واصل وصال د عطاالله خوږياڼي مرکه

 واصل مې له تيرو څوکلونو راهيسې هغه وخت ملګرى شو،چې په مرام راډيوکې مويوځاى کارشروع کړ. واصل صيب زما دژورناليزم نړۍ دراتګ دوهم ملګرى دى  له نوموړى سره مې دهغه دژوندپه هراړخيزه برخو مرکه کړي او وروسته مې دخپل سوالونو اودهغه دځوابونو پرځاى ترينه يوه پيژندنه جوړه کړه . 

 په ونه جګ له رنګه غنم رنګ او دسپين زړه خاوند محمد واصل وصال له نن نه ٢٤ پسرليه وړاندې دژمي په سړه هوا کې چې د هيواد د سردسيرو سيمو غرونه په سپينو واورو پوښل شوي وود پلازمېنې کابل د قلع احمد خان په کلي کې دې فاني نړۍ ته سترګې وغړولې او دماشومتوب خاپوړې يې هم هلته وکړې . محمد واصل وصال د اسلام الدين ځوى د شهاب الدين لمسى اودمحمد الدين کړوسى په قوم توخي پښتانه او ددوى اصلي ټاټوبى د قندهار ولايت دى خودده په وينا ددوى نيکونه سلګونه کلونه وړاندې له خپل اصلي ټاتوبي قندهارنه د ننګرهار هميشه بهار ولايت د بهسودو ولسوالۍ ته کډن شوي او همدلته ميشت شوي دي .

ښاغلي وصال به يوه كارګره كورنۍ كې زوكړه كړې اوپلاريې يو صنعت كار دى. سره لدې چې پخپله دومره سواد نلري خو دعلم او ادب سره بې حده مينه لري او نه غواړي چې بچيان يې  د سواد له خوږ نعمته بې برخې باتې شي .

وصال په اوه کلنۍ کې د ښونځي په لور ګامونه واخستل او دقلع احمد خان په متوسطه ښونځي کې خپلې لومړنۍ زده کړې پېل کړې او لومړى ټولګى يې په بريا ليتوب سره پاى ته ورساوه اولدې سره سم په پلازمينه کابل کې داخلي جنګونو زورواخيست او وصال صاحب د خپلې كورنۍ سره ګاونډي هيواد پاكستان ته مهاجرشو.

دمها جرت به ديار كې وصال دې ته اړشوجې دخپلې مورنۍ ژبې بر ځاى به اردو ژبه زده كړي وكړي .خودالله تعالا له طرفه د وركړي شوي استعدادله كبله په دې وتوانېد چې په ډير لږ وخت كې اردو ژبه زده او تر څنك يې د خبل تولګي اول نومره شي او خپله اول نومره كي دمهاجرت.ترپايه ترلسم تولګي بورې وساتي او كله جي بس له يوي اوږدې مودې  يعني 11كلونو وروسته بېرته خبل ګران هيواد افغانستان ته راستون شو نو يولسم اودولسم تولګي يې دمحمدي صاحب زاده په عالي ليسه كې به لوړو نومرو پاى ته ورساوه. وروسته يې د کانکور ازموينه ورکړه او په ښو نومرو د ننګرهار پوهنتون د ښوونې روزنې  پو هنځي ته بريالى شو او د خپل ذوق او مينې   له مخې چې يي د پښتو ژبې سره لرله د پښتو ادبياتو څانګه انتخاب کړه .

ښاغلى وصال د خپل ټولګي له ممتازو زده کونکو څخه دى چې تر درېيم ټولګي پورې کله به  دويم او کله به درېيم نومره شو خو دم ګړى وروسته له ډېرو هڅو او کوښښونو د څلورم ټولګي په لومړي سمستر کې د خپل ټولګي اول نومره دى .

وصال په  اجتماعي لحاظ د ښو او غوره اخلاقو څښتن دى  او هميش د ښو او نيکو کارونو سره دلچسپي ښئي دى له علمي او ادبي بحثونو سره ډېره مينه لري هڅې خو له ټولو ټولګيوالو سره ډېره مينه لري خو په ځانګړي ډول هغه څوک پرې ډېر ګران دي چې له ده سره په په علمي او ادبي مسايلو بحثونه وکړي . د ده د کاميا بۍيو  رازدا دى چې دى  پخپلو کارونو کې  ډېر دقيق او جدي دى او دنن کار سبا نه پرېږدي .

وصال صاحب له يوه کاله راهيسي د مرام راډيو سره کار کوي او د نوموړي راډيو يو له تکړه کار کونکو څخه دى چې چې په  بيلا بيلو خپرونو کې خپل استعداد ازمويلى دى که هغه ديني ،سياسي ،ادبي او يا تعليمي خپروني دي په ټولو خپرونو ښه ځليدلى دى او دمګړۍ په مرام راډيوکې دخبرې څانګى مسؤل دى اوددې ترڅنګ دى د دواړو ملي ژبو پښتو او دري سربېره د انګليسي او اردو ژبو سره  

هم په ښه شان  بلد تيالري او روانې خبرې پرې کولاى شي .او همدارنګه کمپيو ټر او انټر نيټ ته هم لاس رسى لري او خپلې ورزنيزې چارې پرې په ښه تو ګه پر مخ بولى شي .

وصال ددې تر څنګ چې يو ښه شاعر دى په ليکوالى کې هم ښه تاند او خوځنده قلم لري او تر دې دمه يې يو شمېر نثرونه او لنډې کيسې ليکلي دي خو تر اوسه پورې کوم چاپي اثرنلري .او دم ګړى د شعرونو يوه ټولګه ،د لنډو کيسو او هنري نثرونو يوه مجموعه او دميډا په نوم يو ناول لري چې  تراوسه ندي جاپ شوي .

خپله ليکنه د ښاغلي وصال په يوې غزلې راټولم او هغه ته د څښتن تعالا له درباره د اوږد عمر غوښتنه کوم.

غزل

 

 ښکاري چې پردى پردى نن خپل جانـان »»»»» ساه اخلي له ستونې مې قاتل جــــانـان

 

سـتورو چـــې ګوا اوسى په توره شپه »»»»»» خــوب يوسي له سترګو مې پاګل جانان

 

نن راته په سترګــــو کې مسکۍ شولـه »»»»»» پروت مې دى په سترګو کې کجل جانان

 

مـــــزل وهـــم د خيال په توپاني څپو»»»»»»»» لارې اوږدي مې بې ساحل جـــــــانان

 

زه د انــتظار شېـــبـو ځــــپلــــى يم »»»»»»»» غوږکــــې شرنـــګوي راته پايل جانان

 

 راشــــه د وصـــال له زړه نه وپوښته »»»»»»  ژاړي بې لـــه تا نه ستا واصل جانــان

%d bloggers like this: